బీసీ వసతి గృహం సందర్శించిన ప్రభుత్వ విప్

- విద్యార్థినులతో చర్చలు.. ఉద్యోగ అవకాశాలపై అవగాహన

- జాబ్ క్యాలెండర్ ప్రాముఖ్యతపై సూచనలు

- పోటీ పరీక్షలకు సిద్ధమవ్వాలని పిలుపు

విశాఖపట్నం, మార్చి 21 (పీపుల్స్ మోటివేషన్): ప్రభుత్వ విప్ వేపాడ చిరంజీవి రావు విశాఖపట్నంలోని ఇసుకతోట ప్రాంతంలో ఉన్న బీసీ వెల్ఫేర్ బాలికల వసతి గృహాన్ని శనివారం సందర్శించారు. ఈ సందర్భంగా వివిధ కళాశాలల్లో ఇంటర్ నుంచి పీజీ వరకు చదువుతున్న విద్యార్థినులతో ముఖాముఖి చర్చలు జరిపారు. వారి చదువు, భవిష్యత్ లక్ష్యాలపై ఆసక్తిగా తెలుసుకున్నారు. ప్రభుత్వం విడుదల చేసిన జాబ్ క్యాలెండర్ ప్రాముఖ్యతను విద్యార్థినులకు వివరించారు. చదువుతో పాటు ప్రభుత్వ, ప్రైవేట్ ఉద్యోగాలకు, పోటీ పరీక్షలకు సన్నద్ధం కావాల్సిన అవసరాన్ని తెలియజేశారు. సమయాన్ని సద్వినియోగం చేసుకుంటూ ముందుకు సాగాలని, లక్ష్య సాధన కోసం కృషి చేయాలని సూచించారు. పోటీ పరీక్షలకు సిద్ధమయ్యే సమయంలో పాటించాల్సిన మెళుకువలపై కూడా అవగాహన కల్పించారు. క్రమశిక్షణ, సమయపాలన, నిరంతర సాధన విజయానికి కీలకమని పేర్కొన్నారు. విద్యార్థినులు ఉన్నత స్థాయికి ఎదగాలని ఆకాంక్షించారు. ఈ సందర్భంగా బీసీ వెల్ఫేర్ జిల్లా డిప్యూటీ డైరెక్టర్ కె. రాజేశ్వరి, అసిస్టెంట్ బీసీ వెల్ఫేర్ అధికారి ఆర్. కృష్ణారావు తదితరులు ప్రభుత్వ విప్‌కు స్వాగతం పలికారు. వసతి గృహ సిబ్బంది కూడా కార్యక్రమంలో పాల్గొన్నారు. మొత్తంగా ఈ సందర్శన విద్యార్థినుల్లో నూతన ఉత్సాహాన్ని నింపింది. భవిష్యత్తు లక్ష్యాల సాధనలో ప్రభుత్వం తమకు అండగా ఉంటుందని వారు అభిప్రాయపడ్డారు.