అమరావతిలో క్వాంటం వ్యాలీపై సమీక్ష.. సీఎం చంద్రబాబు

- జాతీయ క్వాంటం మిషన్ లక్ష్యాలకు ఏపీ ముందంజ

- ఐబీఎం, టీసీఎస్, ఎల్ అండ్ టీతో కలిసి క్వాంటం కంప్యూటర్ ఏర్పాటు

- రాజధానిలో 8 టవర్ల నిర్మాణానికి ప్రణాళిక

అమరావతి, మార్చి 31 (పీపుల్స్ మోటివేషన్):

అమరావతి క్వాంటం వ్యాలీ, క్వాంటం హార్డ్‌వేర్ ఉత్పత్తి ఎకోసిస్టంపై నిర్వహించిన రౌండ్ టేబుల్ సమావేశంలో ముఖ్యమంత్రి నారా చంద్రబాబు నాయుడు పాల్గొన్నారు. భవిష్యత్తులో సాంకేతిక రంగంలో క్వాంటం కంప్యూటింగ్ కీలక పాత్ర పోషించనుందని ఆయన పేర్కొన్నారు. జాతీయ క్వాంటం మిషన్ కింద చేపట్టిన కార్యాచరణను ఆంధ్రప్రదేశ్ తొలిగా అందిపుచ్చుకుని అమరావతిలో క్వాంటం వ్యాలీ ఏర్పాటుకు శ్రీకారం చుట్టిందని సీఎం తెలిపారు. దేశంలోనే ముందుండే విధంగా క్వాంటం టెక్నాలజీ అభివృద్ధికి రాష్ట్రం కృషి చేస్తోందని చెప్పారు.

ఈ ప్రాజెక్టులో భాగంగా ఐబీఎం, టీసీఎస్, ఎల్ అండ్ టీ వంటి ప్రముఖ సంస్థల సహకారంతో తొలి క్వాంటం కంప్యూటర్‌ను ఆంధ్రప్రదేశ్‌లో ఏర్పాటు చేయనున్నట్లు వెల్లడించారు. దీనివల్ల సాంకేతిక రంగంలో రాష్ట్రానికి ప్రత్యేక గుర్తింపు లభిస్తుందని పేర్కొన్నారు.

అమరావతిని భవిష్యత్తు సాంకేతిక కేంద్రంగా తీర్చిదిద్దేందుకు ప్రణాళికలు సిద్ధం చేస్తున్నామని సీఎం తెలిపారు. క్వాంటం టెక్నాలజీ అభివృద్ధికి అనుకూలంగా రాజధానిలో 8 టవర్ల నిర్మాణాన్ని చేపట్టనున్నట్లు వెల్లడించారు. ఈ క్వాంటం వ్యాలీ ద్వారా పరిశోధన, ఆవిష్కరణలకు విస్తృత అవకాశాలు ఏర్పడతాయని సీఎం పేర్కొన్నారు. యువతకు కొత్త ఉద్యోగ అవకాశాలు కల్పించడంతో పాటు సాంకేతిక రంగంలో రాష్ట్రాన్ని ముందుకు తీసుకెళ్లే లక్ష్యంతో ఈ ప్రాజెక్టును అమలు చేస్తున్నామని తెలిపారు.

అమరావతిని గ్లోబల్ టెక్నాలజీ హబ్‌గా అభివృద్ధి చేయడం ప్రభుత్వ లక్ష్యమని సీఎం నారా చంద్రబాబు నాయుడు స్పష్టం చేశారు. క్వాంటం కంప్యూటింగ్ రంగంలో ముందడుగు వేయడం ద్వారా రాష్ట్ర అభివృద్ధికి కొత్త దిశలు తెరవబడతాయని ఆయన అన్నారు.