పశ్చిమాసియా పరిస్థితులపై సమీక్ష

• ఇంధన రంగంపై ప్రధాని మోదీ కీలక సమావేశం
• పెట్రోలియం, గ్యాస్, విద్యుత్ రంగాలపై చర్చ
• సరఫరా అంతరాయం లేకుండా చర్యలు
• దేశవ్యాప్తంగా పంపిణీ వ్యవస్థపై దృష్టి

న్యూఢిల్లీ, మార్చి 22 (పీపుల్స్ మోటివేషన్): పశ్చిమాసియాలో మారుతున్న పరిస్థితుల నేపథ్యంలో దేశ ఇంధన భద్రతపై ప్రధానమంత్రి నరేంద్ర మోదీ ఉన్నత స్థాయి సమీక్ష సమావేశం నిర్వహించారు. పెట్రోలియం, ముడి చమురు, సహజ వాయువు, విద్యుత్, ఎరువుల రంగాలకు సంబంధించిన ప్రస్తుత పరిస్థితిని ఈ సమావేశంలో సమగ్రంగా పరిశీలించారు. ఈ సందర్భంగా దేశానికి అవసరమైన ఇంధన సరఫరా ఎలాంటి అంతరాయం లేకుండా కొనసాగేందుకు తీసుకోవాల్సిన చర్యలపై అధికారులు చర్చించారు. అంతర్జాతీయ పరిస్థితుల ప్రభావం దేశంపై పడకుండా ముందస్తు చర్యలు చేపట్టాలని ప్రధాని సూచించారు. ముడి చమురు, గ్యాస్ సరఫరా గొలుసు సజావుగా కొనసాగడం అత్యంత కీలకమని సమావేశంలో పేర్కొన్నారు. సరఫరా మార్గాలు సురక్షితంగా ఉండేలా, అవసరమైన నిల్వలు సిద్ధంగా ఉంచేలా చర్యలు తీసుకోవాలని అధికారులకు ఆదేశాలు జారీ చేశారు. లాజిస్టిక్స్ వ్యవస్థను బలోపేతం చేయడం ద్వారా ఎలాంటి ఆటంకాలు తలెత్తకుండా చూడాలని సూచించారు.

దేశవ్యాప్తంగా ఇంధన పంపిణీ వ్యవస్థ సమర్థవంతంగా పనిచేసేలా చర్యలు తీసుకోవాలని ప్రధాని స్పష్టం చేశారు. ముఖ్యంగా విద్యుత్, ఎరువుల సరఫరా వ్యవస్థలు నిరంతరంగా కొనసాగడం వ్యవసాయం, పరిశ్రమలకు కీలకమని తెలిపారు. పశ్చిమాసియాలో కొనసాగుతున్న ఉద్రిక్త పరిస్థితుల మధ్య దేశ ఆర్థిక వ్యవస్థపై ప్రభావం పడకుండా ప్రభుత్వం అప్రమత్తంగా వ్యవహరిస్తోందని అధికారులు తెలిపారు. ప్రజలకు ఇంధన సరఫరా విషయంలో ఎలాంటి ఇబ్బందులు కలగకుండా అన్ని చర్యలు తీసుకుంటున్నట్లు వెల్లడించారు.