ఎండపల్లిలో పాఠశాల, ఇందిరమ్మ ఇండ్లపై కలెక్టర్ సమీక్ష

- జడ్‌పీహెచ్‌ఎస్ పాఠశాలలో మౌలిక సదుపాయాల పరిశీలన

- విద్యార్థులతో కలెక్టర్ ప్రత్యక్ష సంభాషణ

- ఇందిరమ్మ ఇండ్ల పనులు వేగవంతం చేయాలని ఆదేశాలు

జగిత్యాల, మార్చి 25 (పీపుల్స్ మోటివేషన్): జగిత్యాల జిల్లా ఎండపల్లి మండలం పాత గూడూరు గ్రామంలోని జడ్‌పీహెచ్‌ఎస్ పాఠశాలను జిల్లా కలెక్టర్ బి. సత్యప్రసాద్ బుధవారం పరిశీలించారు. ఈ సందర్భంగా పాఠశాలలో విద్యార్థులకు అందుతున్న మౌలిక సదుపాయాలు, బోధన విధానాలను సమగ్రంగా పరిశీలించి అధికారులకు కీలక సూచనలు చేశారు. పాఠశాలలో తరగతి గదులు, తాగునీరు, మరుగుదొడ్లు, విద్యుత్ సౌకర్యం వంటి అంశాలపై కలెక్టర్ ఆరా తీశారు. విద్యార్థుల హాజరు, మధ్యాహ్న భోజన పథకం అమలు, బోధన నాణ్యతపై సమీక్ష నిర్వహించారు. విద్యార్థులకు సౌకర్యవంతమైన వాతావరణం కల్పించాల్సిన అవసరాన్ని ఆయన ప్రస్తావించారు.

పాఠశాలలో నిర్మాణ దశలో ఉన్న వంటగదిని పరిశీలించిన కలెక్టర్, పనులను నాణ్యతా ప్రమాణాలతో త్వరితగతిన పూర్తి చేయాలని అధికారులకు సూచించారు. మధ్యాహ్న భోజన పథకం సక్రమంగా అమలయ్యేలా అన్ని సదుపాయాలు కల్పించాలని ఆదేశించారు. విద్యార్థులతో ప్రత్యక్షంగా మాట్లాడిన కలెక్టర్, వారి అభ్యాస స్థాయిని తెలుసుకున్నారు. ఉపాధ్యాయులు నాణ్యమైన బోధన అందించి విద్యార్థుల విద్యా ప్రమాణాలు పెంచేందుకు కృషి చేయాలని సూచించారు. పాఠశాలలో ఏవైనా లోపాలు ఉంటే వెంటనే గుర్తించి పరిష్కరించాలని సంబంధిత అధికారులకు ఆదేశించారు.

అనంతరం గ్రామంలో నిర్మాణ దశలో ఉన్న ఇందిరమ్మ ఇండ్లను కూడా పరిశీలించారు. పనుల పురోగతిని అడిగి తెలుసుకుని, నాణ్యతతో నిర్ణీత గడువులో పూర్తి చేయాలని సూచించారు. లబ్ధిదారులకు ఇళ్లు త్వరగా అందేలా చర్యలు తీసుకోవాలని అధికారులను ఆదేశించారు. ఈ కార్యక్రమంలో డీఈఓ కె. రాము, డీపీవో మధన్ మోహన్, హౌసింగ్ పీడీ ప్రసాద్, ఈఈపీఆర్ లక్ష్మణ్ రావు, ఇతర అధికారులు, ఉపాధ్యాయులు పాల్గొన్నారు. సమన్వయంతో పని చేసి అభివృద్ధి పనులను వేగంగా పూర్తి చేయాలని కలెక్టర్ సూచించారు.