ఉపాధి హామీ పథకంపై వైఎస్ షర్మిల విమర్శలు

• జాబ్ కార్డుల సంఖ్య భారీగా తగ్గిందని ఆరోపణ
• గత ఏడాదిలోనే లక్షల కార్డులు తొలగించారని విమర్శ
• 100 రోజుల పని కూడా అందించడం లేదని వ్యాఖ్య

అమరావతి, మార్చి 4 (పీపుల్స్ మోటివేషన్): గ్రామీణ ఉపాధి హామీ పథకం అమలుపై ఆంధ్రప్రదేశ్ కాంగ్రెస్ పార్టీ అధ్యక్షురాలు వైఎస్ షర్మిల రాష్ట్ర ప్రభుత్వంపై విమర్శలు గుప్పించారు. ఉపాధి హామీ పథకంలో జాబ్ కార్డుల సంఖ్య గణనీయంగా తగ్గిందని ఆమె ఆరోపించారు. వైఎస్ రాజశేఖర రెడ్డి హయాంలో రాష్ట్రంలో సుమారు ఒక కోటి పది లక్షల జాబ్ కార్డులు ఉండేవని, ప్రస్తుతం అవి కేవలం అరవై ఐదు లక్షలకు మాత్రమే పరిమితమయ్యాయని తెలిపారు. వివిధ కారణాలు చూపుతూ ప్రభుత్వం పెద్ద ఎత్తున కార్డులను తొలగిస్తున్నట్లు ఆమె విమర్శించారు. గత ఏడాదిలోనే సుమారు పద్దెనిమిది లక్షల యాభై వేల జాబ్ కార్డులను తొలగించినట్లు సమాచారం ఉందని పేర్కొన్నారు. ఉపాధి హామీ చట్టం ప్రకారం ప్రతి కుటుంబానికి సంవత్సరానికి వంద రోజుల పని హామీగా ఇవ్వాల్సి ఉంటుందని గుర్తుచేశారు. కానీ ప్రస్తుతం సంవత్సరానికి యాభై ఎనిమిది రోజులు కూడా పని ఇవ్వడం లేదని షర్మిల విమర్శించారు. వంద రోజుల పని కూడా అందించలేని ప్రభుత్వం ఇప్పుడు 125 రోజుల పని ఇస్తామని చెప్పడం నమ్మశక్యం కాదని ఆమె వ్యాఖ్యానించారు.