ఎర్రచందనం స్మగ్లింగ్‌పై ఏపీ పోలీసుల భారీ దాడి

• రూ.5 కోట్ల విలువైన ఎర్రచందనం స్వాధీనం
• ఎనిమిది మంది అంతర్రాష్ట్ర స్మగ్లర్ల అరెస్టు
• కర్ణాటకలో సంయుక్త ఆపరేషన్

మార్చి 4 (పీపుల్స్ మోటివేషన్): ఎర్రచందనం అక్రమ రవాణాపై ఆంధ్రప్రదేశ్ పోలీసుల ప్రత్యేక దళం భారీ దాడి నిర్వహించి కోట్ల విలువైన సరుకును స్వాధీనం చేసుకుంది. ఈ ఆపరేషన్‌లో సుమారు రూ.5 కోట్ల విలువైన ఎర్రచందనం దుంగలను పట్టుకుని ఎనిమిది మంది అంతర్రాష్ట్ర స్మగ్లర్లను అరెస్టు చేశారు 

పోలీసుల సమాచారం మేరకు కేసు నంబరు 02/2026కు సంబంధించి పరారీలో ఉన్న నిందితులను పట్టుకునేందుకు టాస్క్ ఫోర్స్ బృందం కర్ణాటక రాష్ట్రంలోని హసన్ జిల్లా అర్సికెరే తాలూకా పరిధిలోని సిద్ధాపుర, హరతనహళ్లి గ్రామాలకు వెళ్లింది. కర్ణాటక పోలీసుల సహకారంతో అక్కడి గోదామును తనిఖీ చేయగా, పోలీసులను గమనించిన కొందరు వ్యక్తులు మూడు వాహనాల్లో పారిపోవడానికి ప్రయత్నించారు. అయితే టాస్క్ ఫోర్స్ సిబ్బంది వెంటాడి ఎనిమిది మందిని అదుపులోకి తీసుకున్నారు. నిందితులిచ్చిన సమాచారం మేరకు సమీపంలోని కోళ్ల ఫారం తరహాలో ఉన్న ఓ షెడ్‌ను తనిఖీ చేయగా, అక్కడ భారీగా ఎర్రచందనం నిల్వ ఉంచినట్లు గుర్తించారు. అక్కడి నుంచి 195 ఎర్రచందనం దుంగలు, సుమారు 8 టన్నుల బరువున్న చెక్కను స్వాధీనం చేసుకున్నారు. అదనంగా ఎర్రచందనం కోయడానికి ఉపయోగించే పరికరాలు, వ్యర్థ పదార్థాలు, అక్రమ రవాణాకు ఉపయోగించిన మూడు వాహనాలను కూడా పోలీసులు స్వాధీనం చేసుకున్నారు. ఈ ఘటనపై కేసు నమోదు చేసి దర్యాప్తు కొనసాగుతున్నట్లు అధికారులు తెలిపారు. పరారీలో ఉన్న మరికొందరు నిందితుల కోసం గాలింపు చర్యలు కొనసాగుతున్నాయి.