పుట్టా మహేశ్ వ్యవహారంపై శర్మిల విమర్శలు

• డ్రగ్స్ పార్టీలో ఎంపీ పట్టుబడటం సిగ్గుచేటని వ్యాఖ్యలు
• తక్షణమే అనర్హత వేటు వేయాలని డిమాండ్
• టీడీపీ నుంచి సస్పెండ్ చేయాలని చంద్రబాబుకు సవాల్

అమరావతి, మార్చి 16 (పీపుల్స్ మోటివేషన్): మొయినాబాద్ ఫామ్‌హౌస్‌లో జరిగిన డ్రగ్స్ పార్టీ వ్యవహారంలో టీడీపీ ఎంపీ పుట్టా మహేశ్ కుమార్ యాదవ్ పట్టుబడిన ఘటనపై ఏపీ కాంగ్రెస్ అధ్యక్షురాలు వైఎస్ శర్మిల తీవ్ర స్థాయిలో విమర్శలు చేశారు. రాజ్యాంగబద్ధమైన పదవిలో ఉన్న ఒక ఎంపీ డ్రగ్స్ పార్టీలో పట్టుబడటం సిగ్గుచేటని ఆమె వ్యాఖ్యానించారు. ఈ ఘటనపై వెంటనే కఠిన చర్యలు తీసుకోవాలని డిమాండ్ చేశారు. ఈ విషయంపై సామాజిక మాధ్యమాల్లో స్పందించిన శర్మిల, ఢిల్లీలో పార్లమెంట్ సమావేశాలు జరుగుతున్న సమయంలో ఎంపీ డ్రగ్స్ విందులో పాల్గొనడం దారుణమని పేర్కొన్నారు. ప్రజల నమ్మకంతో ఎన్నికైన ప్రజా ప్రతినిధులు బాధ్యతగా వ్యవహరించాల్సి ఉండగా ఇలాంటి ఘటనలు జరగడం ఆందోళనకరమని అన్నారు. డ్రగ్స్ పరీక్షల్లో పాజిటివ్ వచ్చిన నేపథ్యంలో ఇప్పుడు టీడీపీ అధినేత చంద్రబాబు ఏం చర్యలు తీసుకుంటారో చెప్పాలని ఆమె ప్రశ్నించారు. డ్రగ్స్ తీసుకుంటూ పట్టుబడిన ప్రజా ప్రతినిధులు సమాజానికి ఎలాంటి సందేశం ఇస్తున్నారని శర్మిల నిలదీశారు. ముఖ్యంగా యువతకు ఇది తప్పు సందేశాన్ని ఇస్తుందని ఆమె అన్నారు. ప్రజల ఓట్లతో గెలిచిన నాయకులు బాధ్యతతో వ్యవహరించాల్సి ఉండగా ఇలాంటి చర్యలు ప్రజాస్వామ్య వ్యవస్థకు మచ్చ తీసుకువస్తాయని పేర్కొన్నారు.

ఏలూరు ప్రజలు ఓట్లు వేసి గెలిపించిన ఎంపీ ఈ ఘటనపై వారికి ఏం సమాధానం చెబుతారని శర్మిల ప్రశ్నించారు. డ్రగ్స్‌పై నిజంగా కూటమి ప్రభుత్వం కఠిన చర్యలు తీసుకోవాలనుకుంటే ముందుగా తమ పార్టీకి చెందిన ఎంపీపై చర్యలు తీసుకోవాలని ఆమె డిమాండ్ చేశారు. టీడీపీ నుంచి పుట్టా మహేశ్ కుమార్ యాదవ్‌ను వెంటనే సస్పెండ్ చేసి, అనర్హత వేటు వేయాలని ఆమె స్పష్టం చేశారు. ముఖ్యమంత్రి చంద్రబాబు తన చిత్తశుద్ధిని నిరూపించుకోవాలంటే ఈ ఘటనపై తక్షణమే కఠిన చర్యలు తీసుకోవాలని ఆమె సవాల్ విసిరారు.