అమరావతిలో అగ్నిమాపక కేంద్ర నిర్మాణానికి భూమిపూజ

- గవర్నమెంట్ కాంప్లెక్స్‌లో కొత్త కేంద్రం ఏర్పాటు

- రూ.1.28 కోట్లతో నిర్మాణం చేపట్టనున్న ప్రభుత్వం

- నవంబర్ 2026 నాటికి పనులు పూర్తి లక్ష్యం

అమరావతి, 13 మార్చి (పీపుల్స్ మోటివేషన్): ప్రజారాజధాని అమరావతిలో అగ్నిమాపక సేవలను బలోపేతం చేయడానికి రాష్ట్ర ప్రభుత్వం పలు ప్రాంతాల్లో కొత్త అగ్నిమాపక కేంద్రాలను ఏర్పాటు చేయాలని నిర్ణయించింది. ఈ నేపథ్యంలో అమరావతి గవర్నమెంట్ కాంప్లెక్స్‌లోని నేలపాడులో కొత్త అగ్నిమాపక కేంద్ర నిర్మాణానికి శుక్రవారం భూమిపూజ నిర్వహించారు. ఈ కార్యక్రమంలో ఫైర్ సర్వీసెస్ డైరెక్టర్ జనరల్ పీ.వి. రమణ పాల్గొని భూమిపూజ చేశారు. శాసనసభ, హైకోర్టు వంటి కీలక పరిపాలన భవనాలు నిర్మాణం జరుగుతున్న ప్రాంతంలో ఈ కేంద్రం ఏర్పాటు చేయడం ద్వారా అత్యవసర పరిస్థితుల్లో వేగంగా స్పందించే అవకాశం ఉంటుందని అధికారులు తెలిపారు. సుమారు 50 సెంట్ల స్థలంలో రూ.1.28 కోట్ల అంచనా వ్యయంతో ఈ అగ్నిమాపక కేంద్రాన్ని నిర్మించనున్నారు. ఈ నిర్మాణ పనులను ఆంధ్రప్రదేశ్ పోలీస్ హౌసింగ్ కార్పొరేషన్ చేపడుతోంది. కార్యక్రమంలో గుంటూరు డివిజనల్ ఫైర్ ఆఫీసర్ శ్రీనివాసరెడ్డి, సీఆర్‌డీఏ డీఎఫ్‌ఓ టి.శ్రీనివాస్, ఏపీ పోలీస్ హౌసింగ్ కార్పొరేషన్ ఇంజినీరింగ్ అధికారులు తదితరులు పాల్గొన్నారు. నేలపాడులో ఏర్పాటు కానున్న ఈ అగ్నిమాపక కేంద్రాన్ని 2026 నవంబర్ నాటికి పూర్తి చేయాలని అధికారులు లక్ష్యంగా పెట్టుకున్నారు.