వంట గ్యాస్ సరఫరాలో అంతరాయం ఉండకూడదు: సీఎం చంద్రబాబు

• ఎల్పీజీ నిల్వలు, సరఫరాపై సమీక్ష సమావేశం
• ఆస్పత్రులు, పాఠశాలలకు నిరంతర సరఫరా ఆదేశం
• బ్లాక్ మార్కెట్‌పై కఠిన చర్యలు తీసుకోవాలని సూచన

అమరావతి, 16 మార్చి (పీపుల్స్ మోటివేషన్): గృహ వినియోగానికి వంట గ్యాస్ సిలిండర్ల సరఫరాలో ఎలాంటి అంతరాయం కలగకుండా చూడాలని ముఖ్యమంత్రి నారా చంద్రబాబు నాయుడు అధికారులను ఆదేశించారు. రాష్ట్రంలో ఎల్పీజీ నిల్వలు, బుకింగ్‌లు మరియు సరఫరా పరిస్థితిపై ఆర్టీజీఎస్ కేంద్రం నుంచి సమీక్ష సమావేశం నిర్వహించారు. ఈ సందర్భంగా రాష్ట్ర ప్రజలకు నిరంతరంగా గ్యాస్ అందేలా ముందస్తు చర్యలు తీసుకోవాలని అధికారులకు సూచించారు. ప్రత్యేకంగా ఆస్పత్రులు, పాఠశాలలు, దేవాలయాలకు గ్యాస్ సరఫరా ఎలాంటి అంతరాయం లేకుండా కొనసాగాలని సీఎం స్పష్టం చేశారు. ప్రజలకు అవసరమైన ముఖ్యమైన సేవలు అందించే సంస్థలకు గ్యాస్ సరఫరా ప్రాధాన్యతతో ఉండాలని తెలిపారు. గృహ వినియోగదారులకు కూడా గ్యాస్ అందుబాటులో ఉండేలా సరఫరా వ్యవస్థను సమర్థంగా నిర్వహించాలని సూచించారు.

ప్రస్తుతం రాష్ట్రంలో మొత్తం 17,209 మెట్రిక్ టన్నుల ఎల్పీజీ నిల్వలు ఉన్నట్లు అధికారులు సీఎంకు వివరించారు. కేంద్ర ప్రభుత్వ రంగ సంస్థలైన హెచ్‌పీసీఎల్, బీపీసీఎల్, ఐఓసీఎల్ సంస్థలకు చెందిన 1154 ఏజెన్సీల ద్వారా రాష్ట్రవ్యాప్తంగా గ్యాస్ సరఫరా జరుగుతోందని తెలిపారు. అవసరాలకు అనుగుణంగా సరఫరా కొనసాగుతోందని అధికారులు పేర్కొన్నారు. గ్యాస్ సిలిండర్లు బ్లాక్ మార్కెట్‌కు తరలిపోకుండా కట్టుదిట్టమైన చర్యలు తీసుకోవాలని సీఎం చంద్రబాబు అధికారులను ఆదేశించారు. అక్రమంగా గ్యాస్ నిల్వలు, విక్రయాలు జరిగితే కఠిన చర్యలు తీసుకోవాలని స్పష్టం చేశారు. ప్రజలకు ఇబ్బందులు కలగకుండా సరఫరా వ్యవస్థను పర్యవేక్షించాలని సూచించారు ఈ సమీక్ష సమావేశంలో పౌర సరఫరాల శాఖ మంత్రి నాదెండ్ల మనోహర్‌తో పాటు ఓఎన్జీసీ, భారత్ పెట్రోలియం, హిందుస్తాన్ పెట్రోలియం, ఇండియన్ ఆయిల్ సంస్థల ప్రతినిధులు మరియు వివిధ శాఖల ఉన్నతాధికారులు పాల్గొన్నారు. రాష్ట్రంలో గ్యాస్ సరఫరా వ్యవస్థను సమర్థంగా నిర్వహించేందుకు అన్ని సంస్థలు సమన్వయంతో పనిచేయాలని సీఎం సూచించారు.