ఎల్పీజీ కొరతపై ప్రధాని స్పందించాలి: 

• పార్లమెంట్‌లో కాంగ్రెస్ ఎంపీ డిమాండ్
• మిడిల్ ఈస్ట్ ఉద్రిక్తతలపై విమర్శలు
• గ్యాస్ కొరతపై తక్షణ చర్యలు కోరిన చామల
• చామల కిరణ్ కుమార్ రెడ్డి

న్యూఢిల్లీ, మార్చి 12 (పీపుల్స్ మోటివేషన్): దేశంలో ఎల్పీజీ కొరతపై పార్లమెంట్‌లో ప్రధాని మోదీ స్పందించాలని కాంగ్రెస్ ఎంపీ చామల కిరణ్ కుమార్ రెడ్డి డిమాండ్ చేశారు. ప్రస్తుతం పార్లమెంట్ సమావేశాలు జరుగుతున్నప్పటికీ మిడిల్ ఈస్ట్‌లో నెలకొన్న ఉద్రిక్త పరిస్థితులపై ప్రధాని స్పందించడం లేదని ఆయన విమర్శించారు. దేశంలో ఇంధన సరఫరా పరిస్థితిపై ప్రభుత్వం స్పష్టత ఇవ్వాల్సిన అవసరం ఉందన్నారు. మిడిల్ ఈస్ట్ ప్రాంతంలో జరుగుతున్న యుద్ధ పరిస్థితులు ప్రపంచ ఇంధన మార్కెట్‌పై ప్రభావం చూపుతున్నాయని చామల కిరణ్ కుమార్ రెడ్డి పేర్కొన్నారు. ఈ నేపథ్యంలో దేశంలో గ్యాస్ సరఫరాపై ప్రజల్లో ఆందోళనలు నెలకొన్నాయని అన్నారు. అయితే ఈ కీలక అంశంపై ప్రధాని ఇప్పటివరకు మాట్లాడకపోవడం ఆశ్చర్యకరమని వ్యాఖ్యానించారు.

అమెరికా అధ్యక్షుడు ట్రంప్‌కు మోదీ భయపడుతున్నారనే విమర్శలు కూడా చేశారు. అంతర్జాతీయ పరిస్థితుల నేపథ్యంలో దేశ ప్రయోజనాలను కాపాడేలా ప్రభుత్వం చర్యలు తీసుకోవాలని సూచించారు. దేశంలో ఎల్పీజీ కొరతను త్వరగా నివారించేందుకు కేంద్ర ప్రభుత్వం వెంటనే చర్యలు చేపట్టాలని చామల కిరణ్ కుమార్ రెడ్డి డిమాండ్ చేశారు.