పైలట్ రోహిత్ రెడ్డి సస్పెన్షన్‌పై బీఆర్ఎస్‌లో చర్చలు

- మోయినాబాద్ ఫార్మ్ హౌస్‌పై పోలీసుల దాడి

- డ్రగ్స్ వినియోగం ఆరోపణలతో రాజకీయ కలకలం

- ఒకటి రెండు రోజుల్లో నిర్ణయం తీసుకునే అవకాశం

- పార్టీ కార్యకలాపాలకు దూరంగా ఉండాలని సూచన భావన

హైదరాబాద్, 16 మార్చి (పీపుల్స్ మోటివేషన్):

బీఆర్ఎస్ మాజీ ఎమ్మెల్యే పైలట్ రోహిత్ రెడ్డి పేరు ఇటీవల వెలుగులోకి వచ్చిన డ్రగ్స్ పార్టీ వివాదంతో రాజకీయంగా చర్చనీయాంశంగా మారింది. రంగారెడ్డి జిల్లా మొయినాబాద్ ప్రాంతంలోని ఆయన ఫార్మ్ హౌస్‌లో జరిగిన పార్టీపై పోలీసులు దాడి చేయడంతో ఈ వ్యవహారం బయటపడింది. ఈ ఘటనలో పలువురు ప్రముఖులు, వ్యాపారవేత్తలు పాల్గొన్నట్లు పోలీసుల దర్యాప్తులో బయటపడినట్లు సమాచారం. 

పోలీసులు ఫార్మ్ హౌస్‌పై దాడి చేసిన సమయంలో అక్కడ డ్రగ్స్ వినియోగం జరిగినట్లు అనుమానాలు వ్యక్తమయ్యాయి. ఈ ఘటనలో పలువురు వ్యక్తులను అదుపులోకి తీసుకుని విచారణ జరిపినట్లు అధికారులు తెలిపారు. ప్రాథమిక పరీక్షల్లో కొందరు డ్రగ్స్ వినియోగించినట్లు తేలినట్లు సమాచారం రావడంతో ఈ కేసు రాష్ట్రవ్యాప్తంగా చర్చకు దారితీసింది. ఈ ఘటనలో భాగంగా మాజీ ఎమ్మెల్యే పైలట్ రోహిత్ రెడ్డి పేరు కూడా వెలుగులోకి రావడంతో రాజకీయ వర్గాల్లో తీవ్ర చర్చ జరిగింది. ఆయనకు చెందిన ఫార్మ్ హౌస్‌లోనే పార్టీ నిర్వహించబడినట్లు పోలీసులు గుర్తించినట్లు వార్తలు వెలువడ్డాయి. ఈ కేసుకు సంబంధించి మరిన్ని వివరాలను తెలుసుకునేందుకు పోలీసులు దర్యాప్తు కొనసాగిస్తున్నట్లు తెలుస్తోంది. ఈ వివాదం నేపథ్యంలో బీఆర్ఎస్ పార్టీ కూడా అంతర్గతంగా చర్చలు జరుపుతున్నట్లు సమాచారం. పార్టీ ప్రతిష్ఠను దృష్టిలో ఉంచుకుని పైలట్ రోహిత్ రెడ్డి వ్యవహారంపై క్రమశిక్షణ చర్యలు తీసుకునే అవకాశాన్ని అధిష్టానం పరిశీలిస్తున్నట్లు పార్టీ వర్గాలు చెబుతున్నాయి. ఈ పరిణామాల నేపథ్యంలో ఒకటి రెండు రోజుల్లో పైలట్ రోహిత్ రెడ్డి సస్పెన్షన్‌పై పార్టీ అధిష్టానం నిర్ణయం తీసుకునే అవకాశం ఉందని రాజకీయ వర్గాల్లో ప్రచారం జరుగుతోంది. తన నిర్దోషిత్వాన్ని నిరూపించుకునే వరకు పార్టీ కార్యకలాపాలకు దూరంగా ఉండాలని సూచించే అవకాశముందని కూడా పార్టీ వర్గాలు పేర్కొంటున్నాయి.