ధర్మారం మండలంలో కలెక్టర్ విస్తృత పర్యటన

- తహసీల్దార్ కార్యాలయం, కేజీబీవీ తనిఖీ

- భూ భారతి దరఖాస్తుల పరిష్కారంపై ఆదేశాలు

- బాలికలకు నాణ్యమైన విద్య, ఆహారంపై దృష్టి

ధర్మారం, మార్చి 28 (పీపుల్స్ మోటివేషన్): ధర్మారం మండలంలో జిల్లా కలెక్టర్ కోయ శ్రీ హర్ష శనివారం విస్తృతంగా పర్యటించారు. ఈ సందర్భంగా తహసీల్దార్ కార్యాలయం, కేజీబీవీ విద్యాసంస్థలను సందర్శించి అక్కడి నిర్వహణను పరిశీలించారు. తహసీల్దార్ కార్యాలయంలో స్లాట్ బుకింగ్ రిజిస్ట్రేషన్ ప్రక్రియను సమీక్షించిన కలెక్టర్, ప్రజలకు ఎటువంటి ఇబ్బందులు కలగకుండా సకాలంలో నమోదు జరిగేలా చర్యలు తీసుకోవాలని అధికారులకు ఆదేశించారు. భూ భారతి ఆన్‌లైన్ దరఖాస్తులను పెండింగ్‌లో ఉంచకుండా త్వరితగతిన పరిష్కరించాలని సూచించారు. ప్రజలకు సేవలు అందించే వ్యవస్థలో పారదర్శకత, వేగం ఉండాలని కలెక్టర్ పేర్కొన్నారు. ప్రతి దరఖాస్తును సమయానికి పరిష్కరించడం ద్వారా ప్రజల్లో ప్రభుత్వంపై నమ్మకం పెరుగుతుందని అన్నారు.

తదుపరి కేజీబీవీ పాఠశాలను సందర్శించిన కలెక్టర్, అక్కడి సదుపాయాలను పరిశీలించారు. బాలికలకు అందుతున్న ఆహారం నాణ్యంగా ఉండాలని, పోషకాహారంపై ప్రత్యేక దృష్టి పెట్టాలని సూచించారు. విద్యార్థుల ఆరోగ్యం, విద్యా ప్రమాణాలపై ఎటువంటి రాజీ ఉండకూడదని స్పష్టం చేశారు.

అదేవిధంగా కేజీబీవీ రినోవేషన్ పనులను సమయానికి పూర్తి చేయాలని అధికారులను ఆదేశించారు. విద్యార్థులకు మెరుగైన వసతులు కల్పించడం ద్వారా వారి అభ్యాసానికి అనుకూల వాతావరణం కల్పించాలని తెలిపారు. ఈ పర్యటనలో తహసీల్దార్ శ్రీనివాస్‌తో పాటు సంబంధిత శాఖల అధికారులు పాల్గొన్నారు. మండలంలోని ప్రభుత్వ సేవలను మరింత సమర్థవంతంగా అందించేందుకు అధికారులు కృషి చేయాలని కలెక్టర్ సూచించారు.