Health news: పడుకునే ముందు వెన్న తింటే నిజంగా నిద్ర వస్తుందా?

• సోషల్ మాధ్యమాల్లో కొత్త ప్రచారం
• వైద్యుల స్పష్టీకరణ – ఆధారాలు లేవు
• మంచి నిద్రకు సరైన అలవాట్లే మార్గం

మార్చి 2 (పీపుల్స్ మోటివేషన్): ఈ రోజుల్లో సమయానికి నిద్రపోవడం చాలా మందికి సవాలుగా మారింది. ఫోన్‌ల వినియోగం, గంటల తరబడి టీవీ వీక్షణ, రాత్రిళ్లు ఆలస్యంగా పడుకోవడం వంటి అలవాట్ల వల్ల విశ్రాంతి నిద్ర దూరమవుతోంది. ఇదిలా ఉంటే, ఇటీవల సోషల్ మాధ్యమాల్లో పడుకునే ముందు వెన్న తింటే బాగా నిద్ర వస్తుందనే ప్రచారం విస్తరిస్తోంది. ఈ విషయంపై వైద్య నిపుణులు మాత్రం స్పష్టంగా అభిప్రాయం వెల్లడిస్తున్నారు. పడుకునే ముందు వెన్న తినడం వల్ల నిద్ర మెరుగుపడుతుందని చెప్పడానికి ఎటువంటి శాస్త్రీయ ఆధారాలు లేవని వైద్యులు చెబుతున్నారు. వెన్నలో సంతృప్త కొవ్వులు అధికంగా ఉండగా, నిద్రకు ఉపయుక్తమైన ప్రోటీన్, ట్రిప్టోఫాన్, మెగ్నీషియం వంటి పోషకాలు చాలా తక్కువగా ఉంటాయని వారు వివరిస్తున్నారు. సోషల్ మాధ్యమాల్లో నడుస్తున్న ఈ ప్రచారం కేవలం ఒక ట్రెండ్ మాత్రమేనని స్పష్టం చేస్తున్నారు. రాత్రి సమయంలో రక్తంలో చక్కెర స్థాయిలు తగ్గడం వల్ల చెమటలు పట్టడం, గుండె వేగంగా కొట్టుకోవడం వంటి సమస్యలతో నిద్ర భంగం కలగవచ్చని వైద్యులు చెబుతున్నారు. అయితే దీన్ని నివారించడానికి వెన్న వంటి కొవ్వు పదార్థాలు తీసుకోవడం సరైన మార్గం కాదని సూచిస్తున్నారు. రక్తంలో చక్కెర స్థాయిలు స్థిరంగా ఉండాలంటే ప్రోటీన్, ఫైబర్, సంక్లిష్ట కార్బోహైడ్రేట్లు కలిగిన ఆహారాలను పడుకునే ముందు రెండు గంటలకే తీసుకోవాలని సలహా ఇస్తున్నారు.

వెన్న, అధిక కొవ్వు పదార్థాలు, చక్కెరలతో కూడిన ఆహారాలు రాత్రిపూట తీసుకోవడం వల్ల అజీర్ణం, ఆమ్లత్వం, అధిక కొలెస్ట్రాల్, గుండె సంబంధిత సమస్యలు తలెత్తే ప్రమాదం ఉందని హెచ్చరిస్తున్నారు. మంచి నిద్ర కోసం ప్రతిరోజూ ఒకే సమయానికి పడుకోవడం, లేవడం అలవాటు చేసుకోవడం అవసరం. నిద్రకు ముందు స్క్రీన్ వినియోగాన్ని తగ్గించడం, సాయంత్రం తర్వాత కాఫీన్ పదార్థాలను దూరంగా ఉంచడం వంటి అలవాట్లు పాటిస్తే సహజమైన, ప్రశాంతమైన నిద్ర లభిస్తుందని వైద్యులు సూచిస్తున్నారు.