తెలంగాణ హైకోర్టు ప్రధాన న్యాయమూర్తిగా జస్టిస్ అపరేష్ కుమార్ సింగ్ నియామకం..

తెలంగాణ హైకోర్టు ప్రధాన న్యాయమూర్తిగా జస్టిస్ అపరేష్ కుమార్ సింగ్ నియామకం..

తెలంగాణ హైకోర్టుకు కొత్త ప్రధాన న్యాయమూర్తిగా జస్టిస్ అపరేష్ కుమార్ సింగ్ జులై 14న నియమితులయ్యారు. ఈ నియామకానికి రాష్ట్రపతి ఆమోదం తెలిపారు. సుప్రీంకోర్టు కొలీజియం మే 26న చేసిన సిఫార్సుల మేరకు ఈ నియామకం జరిగింది.

జస్టిస్ అపరేష్ కుమార్ సింగ్2023 ఏప్రిల్ 17 నుండి త్రిపుర హైకోర్టు ప్రధాన న్యాయమూర్తిగా బాధ్యతలు నిర్వర్తిస్తున్నారు.

ఇతర కీలక బదిలీలు/నియామకాలు:

తెలంగాణ హైకోర్టు నుండి జరిగిన బదిలీలు:

తెలంగాణ హైకోర్టు తాత్కాలిక ప్రధాన న్యాయమూర్తిగా ఉన్న జస్టిస్ సుజయ్ పాల్ను కలకత్తా హైకోర్టు న్యాయమూర్తిగా కేంద్ర ప్రభుత్వం బదిలీ చేసింది. జనవరిలో జస్టిస్ ఆలోక్ ఆరాధే బదిలీ అయిన తర్వాత జస్టిస్ సుజయ్ పాల్ అప్పటి నుండి తాత్కాలిక ప్రధాన న్యాయమూర్తిగా కొనసాగుతున్నారు.

తెలంగాణ హైకోర్టు న్యాయమూర్తి జస్టిస్ తడకమళ్ల వినోద్ కుమార్ మద్రాస్ హైకోర్టుకు బదిలీ అయ్యారు. ఇతర హైకోర్టులకు కొత్త ప్రధాన న్యాయమూర్తుల నియామకాలు:

సుప్రీంకోర్టు కొలీజియం గత మే నెలలో చేసిన సిఫార్సుల మేరకు, తెలంగాణతో పాటు మరో నాలుగు రాష్ట్రాల హైకోర్టులకు జులై 14న కొత్త ప్రధాన న్యాయమూర్తులు నియమితులయ్యారు.

మధ్యప్రదేశ్ హైకోర్టు: జస్టిస్ సంజీవ్ సక్తేవా మధ్యప్రదేశ్ హైకోర్టుకు కొత్త ప్రధాన న్యాయమూర్తి (సీజే)గా నియమితులయ్యారు. ప్రస్తుతం ఆయన అదే హైకోర్టులో తాత్కాలిక సీజేగా బాధ్యతలు నిర్వర్తిస్తున్నారు.

కర్ణాటక హైకోర్టు: దిల్లీ హైకోర్టు న్యాయమూర్తిగా ఉన్న జస్టిస్ విభు బబ్రూ కర్ణాటక హైకోర్టు ప్రధాన న్యాయమూర్తిగా పదోన్నతి పొందారు.

గౌహతి హైకోర్టు: పట్నా హైకోర్టు తాత్కాలిక ప్రధాన న్యాయమూర్తిగా ఉన్న జస్టిస్ అశుతోష్ కుమార్ గౌహతి హైకోర్టు చీఫ్ జస్టిస్ గా నియమితులయ్యారు

పట్నా హైకోర్టు: ప్రస్తుతం పట్నా హైకోర్టులో న్యాయమూర్తిగా ఉన్న జస్టిస్ విపుల్ మనుబాయ్ పంచోలీ అదే హైకోర్టుకు ప్రధాన న్యాయమూర్తిగా పదోన్నతి పొందారు

ఝార్ఖండ్ హైకోర్టు: హిమాచల్ ప్రదేశ్ హైకోర్టు న్యాయమూర్తి జస్టిస్ తర్లోక్ సింగ్ చౌహాన్ను ఝార్ఖండ్ హైకోర్టు ప్రధాన న్యాయమూర్తిగా నియమించారు.

ప్రధాన న్యాయమూర్తుల బదిలీలు:

కొలీజియం చేసిన సిఫార్సులకు రాష్ట్రపతి ఆమోదముద్ర వేయడంతో కింది ప్రధాన న్యాయమూర్తులు బదిలీ అయ్యారు:

రాజస్థాన్ హైకోర్టు ప్రధాన న్యాయమూర్తి జస్టిస్ మణీంద్ర మోహన్ శ్రీవాస్తవ: ఈయన మద్రాస్ హైకోర్టు చీఫ్ జస్టిస్ బదిలీ అయ్యారు.

మద్రాస్ హైకోర్టు చీఫ్ జస్టిస్ కె.ఆర్. శ్రీరామ్: ఈయన రాజస్థాన్ హైకోర్టు ప్రధాన న్యాయమూర్తిగా బదిలీ అయ్యారు.

ఝార్ఖండ్ హైకోర్టు ప్రధాన న్యాయమూర్తి జస్టిస్ ఎం.ఆర్. రామచంద్రరావు: ఈయన త్రిపుర హైకోర్టుకు ప్రధాన న్యాయమూర్తిగా బదిలీ అయ్యారు.

ఏపీ హైకోర్టుకు జస్టిస్ బట్టు దేవానంద్:

జస్టిస్ బట్టు దేవానంద్ ఏపీ హైకోర్టుకు బదిలీ అయ్యారు. ఆయన మద్రాస్ హైకోర్టు నుంచి తిరిగి ఏపీ హైకోర్టుకు రావడానికి రాష్ట్రపతి ద్రౌపదీ ముర్ము ఆమోదముద్ర వేశారు.

పదవీ కాలం: జస్టిస్ దేవానంద్ పదవీ కాలం 2028 ఏప్రిల్ 13 వరకు ఉంది. హైకోర్టు న్యాయమూర్తుల నియామకం (ప్రధాన న్యాయమూర్తితో సహా):

ఆర్టికల్ 217: భారత రాజ్యాంగంలోని ఆర్టికల్ 217 హైకోర్టు న్యాయమూర్తుల నియామకం మరియు పదవీ కాలం గురించి వివరిస్తుంది.

హైకోర్టు న్యాయమూర్తులను రాష్ట్రపతి నియమిస్తారు.

న్యాయమూర్తుల నియామకంలో రాష్ట్రపతి కింది వారితో సంప్రదించాలి:

భారత ప్రధాన న్యాయమూర్తి (CJI) సంబంధిత రాష్ట్ర గవర్నర్

ప్రధాన న్యాయమూర్తి కాకుండా ఇతర న్యాయమూర్తులను నియమించేటప్పుడు, సంబంధిత హైకోర్టు ప్రధాన న్యాయమూర్తితో కూడా సంప్రదిస్తారు.

పదవీ కాలం: హైకోర్టు న్యాయమూర్తులు 62 సంవత్సరాల వయస్సు వచ్చేవరకు పదవిలో ఉంటారు.

అర్హతలు: ఒక వ్యక్తి హైకోర్టు న్యాయమూర్తిగా నియమించబడటానికి కింది అర్హతలు ఉండాలి:

భారత పౌరుడై ఉండాలి.

భారత భూభాగంలో కనీసం పది సంవత్సరాలు న్యాయాధికారిగా పని చేసి ఉండాలి; లేదా కనీసం పది సంవత్సరాలు హైకోర్టులో లేదా వరుసగా రెండు లేదా అంతకంటే ఎక్కువ కోర్టులలో న్యాయవాదిగా పని చేసి ఉండాలి.

కొలీజియం వ్యవస్థ:

రాజ్యాంగంలో నేరుగా పేర్కొనబడనప్పటికీ సుప్రీంకోర్టు తీర్పుల ద్వారా కొలీజియం వ్యవస్థ అభివృద్ధి చేయబడింది. ఈ వ్యవస్థ హైకోర్టు న్యాయమూర్తులు మరియు ప్రధాన న్యాయమూర్తుల నియామకాలు మరియు బదిలీలను సిఫార్సు చేస్తుంది

ప్రధాన న్యాయమూర్తి నియామకం: హైకోర్టుల ప్రధాన న్యాయమూర్తులను సాధారణంగా ఆయా రాష్ట్రాల వెలుపలి నుండి నియమించే విధానం ఉంటుంది తద్వారా స్థానిక పక్షపాతాన్ని నివారించవచ్చు.

ప్రక్రియ:

1. హైకోర్టు ప్రధాన న్యాయమూర్తి నియామక ప్రతిపాదనను ప్రారంభిస్తారు.

2.ఈ ప్రతిపాదన ముఖ్యమంత్రికి పంపబడుతుంది ముఖ్యమంత్రి గవర్నర్కు సిఫార్సు చేస్తారు.

3.గవర్నర్ దానిని కేంద్ర న్యాయశాఖ మంత్రికి పంపుతారు, ఆయన దానిని ప్రధానమంత్రికి, చివరికి రాష్ట్రపతికి అంతిమ ఆమోదం కోసం సమర్పిస్తారు.

4. సుప్రీంకోర్టు కొలీజియం (CJI మరియు ఇద్దరు సీనియర్ న్యాయమూర్తులు) హైకోర్టు న్యాయమూర్తుల నియామకాలు మరియు బదిలీలపై నిర్ణయం తీసుకుంటుంది.

తాత్కాలిక ప్రధాన న్యాయమూర్తి నియామకం (ఆర్టికల్ 223):

ఆర్టికల్ 223 ప్రకారం, హైకోర్టు ప్రధాన న్యాయమూర్తి పదవి ఖాళీగా ఉన్నప్పుడు లేదా ప్రధాన న్యాయమూర్తి లేకపోవడం లేదా ఇతర కారణాల వల్ల తన విధులను నిర్వర్తించలేనప్పుడు, రాష్ట్రపతి ఆ హైకోర్టులోని ఇతర న్యాయమూర్తులలో ఒకరిని తాత్కాలిక ప్రధాన న్యాయమూర్తిగా నియమించవచ్చు.

న్యాయమూర్తుల బదిలీ (ఆర్టికల్ 222):

ఆర్టికల్ 222(1) ప్రకారం, భారత ప్రధాన న్యాయమూర్తితో సంప్రదించిన తర్వాత, రాష్ట్రపతి ఒక హైకోర్టు న్యాయమూర్తిని ఒక హైకోర్టు నుండి మరొక హైకోర్టుకు బదిలీ చేయవచ్చు