రాహుల్ రిగ్గింగ్ ఆరోపణలను తోసిపుచ్చిన ఎన్నికల కమిషన్

న్యూఢిల్లీ, నవంబర్ 5 (పీపుల్స్ మోటివేషన్): హర్యానా అసెంబ్లీ ఎన్నికల్లో భారీ స్థాయిలో ఓట్ల రిగ్గింగ్ జరిగిందన్న కాంగ్రెస్ నేత, లోక్‌సభలో ప్రతిపక్ష నాయకుడు రాహుల్ గాంధీ చేసిన ఆరోపణలను కేంద్ర ఎన్నికల కమిషన్ (ఈసీ) ఖండించింది. ఓటర్ల జాబితా విషయంలో ఎలాంటి అధికారిక అభ్యంతరాలు, అప్పీలు తమ వద్దకు రాలేదని ఈసీ వర్గాలు స్పష్టం చేసినట్లు పీటీఐ వార్తా సంస్థ తెలిపింది. ఈసీ వర్గాలు పేర్కొన్న వివరాల ప్రకారం, ఓటర్ లిస్ట్ సవరణ ప్రక్రియలో రాజకీయ పార్టీలు తమ బూత్ స్థాయి ఏజెంట్ల ద్వారా లోపాలను సూచించే అవకాశం ఉంటుంది. అయితే హర్యానా కేసులో కాంగ్రెస్ ఏజెంట్లు ఎలాంటి అభ్యంతరాలు నమోదు చేయలేదని ఈసీ పేర్కొంది. ఫేక్ ఓటర్ల అంశాన్ని ముందుగానే లేవనెత్తాల్సిన అవసరం ఉన్నప్పటికీ, సవరణ దశలో స్పందించకపోవడం ఎలా అని ప్రశ్నించింది.

రాహుల్ గాంధీ బుధవారం విలేకరులతో మాట్లాడుతూ, హర్యానాలో ఎన్నికల కమిషన్–బీజేపీ కలిసి కుట్రపూరితంగా వ్యవహరించారని, రాష్ట్రంలో సుమారు 2.5 మిలియన్ల ఓట్లు చోరీ అయ్యాయని ఆరోపించారు. ఇందులో 5.21 లక్షల నకిలీ ఓట్లు, 93,174 చెల్లని ఓటర్లు, 19.26 లక్షల బల్క్ ఓటర్లు ఉన్నారని రాహుల్ పేర్కొన్నారు. హర్యానా, ఉత్తరప్రదేశ్ రెండింటికీ చెందిన వేలాది మంది — వీరిలో బీజేపీతో సంబంధం ఉన్నవారూ ఉన్నారని ఆరోపించారు. రాహుల్ ఆరోపణలతో రాజకీయ వాతావరణం మరింత వేడెక్కిన నేపథ్యంలో, ఈసీ స్పందన చర్చనీయాంశమైంది. ఇప్పుడు ఈ అంశంపై కాంగ్రెస్ తరఫున తదుపరి వ్యాఖ్య ఏం ఉంటుందన్న దానిపై దృష్టి నిలిచింది.