పాఠశాల విద్యార్థులకు శాసనసభ ప్రత్యక్ష వీక్షణ

- స్పీకర్ చొరవతో అమరావతిలో అరుదైన అవకాశం

- పెండ్యాల జిల్లా పరిషత్ ఉన్నత పాఠశాల విద్యార్థుల సందర్శనం

- ప్రజాస్వామ్య విధానాలపై అవగాహన పెంపు

అమరావతి, ఫిబ్రవరి 20 (పీపుల్స్ మోటివేషన్): పాఠశాల విద్యార్థులకు శాసనసభ సమావేశాలను ప్రత్యక్షంగా వీక్షించే అరుదైన అవకాశం లభించింది. గౌరవ శాసనసభ స్పీకర్ అయ్యన్నపాత్రుడు చొరవతో జిల్లా పరిషత్ ఉన్నత పాఠశాల, పెండ్యాల విద్యార్థులు అమరావతి శాసనసభను సందర్శించారు.

ఈ సందర్భంగా విద్యార్థులు శాసనసభలో జరుగుతున్న చర్చలు, చట్టాల రూపకల్పన విధానం, సభ్యుల పాత్రలను ప్రత్యక్షంగా వీక్షించారు. ప్రజాస్వామ్య వ్యవస్థ ఎలా పనిచేస్తుందో ప్రత్యక్ష అనుభవం ద్వారా తెలుసుకునే అవకాశం దక్కడం తమకు గొప్ప అనుభూతి కలిగించిందని విద్యార్థులు తెలిపారు. సందర్శనలో భాగంగా విద్యార్థులు శాసనసభ ఉపస్పీకర్ రఘురామరాజును మర్యాదపూర్వకంగా కలిశారు. అలాగే ప్రభుత్వ విప్, ఎమ్మెల్యే తంగిరాల సౌమ్యతో భేటీ అయి తమ ఆనందాన్ని వ్యక్తం చేశారు. ప్రజాస్వామ్య విలువలపై అవగాహన పెంచే ఈ కార్యక్రమం తమకు ప్రేరణగా నిలిచిందని పేర్కొన్నారు. ఇలాంటి కార్యక్రమాలు భవిష్యత్ తరాలకు దిశానిర్దేశకంగా ఉంటాయని ఉపాధ్యాయులు అభిప్రాయపడ్డారు. విద్యార్థులకు శాసనసభ సందర్శన అవకాశాన్ని కల్పించినందుకు వారు ప్రభుత్వానికి కృతజ్ఞతలు తెలిపారు.