ఆదినారాయణ రెడ్డి వ్యాఖ్యలతో పార్టీకి సంబంధం లేదు: ఏపీ బీజేపీ చీఫ్ మాధవ్

- ఏపీ బీజేపీలో ప్రకంపనలు

- కూటమిపై ‘కమ్మ’ వ్యాఖ్యలతో దుమారం

- ఆదినారాయణ రెడ్డిని వివరణ అడుగుతాం

అమరావతి, ఫిబ్రవరి 10 (పీపుల్స్ మోటివేషన్):

ఏపీ బీజేపీ ఎమ్మెల్యే ఆదినారాయణ రెడ్డి చేసిన వ్యాఖ్యలు రాష్ట్ర రాజకీయాల్లో కలకలం రేపాయి. కూటమి ప్రభుత్వం ఇంకా ‘కమ్మగా’ ఉందని, రాష్ట్రంలో బీజేపీ లేకపోతే టీడీపీ, జనసేన కూడా లేవని, కూటమిలో బీజేపీనే ప్రధానం అన్న వ్యాఖ్యలు తీవ్ర దుమారానికి దారితీశాయి. ఈ వ్యాఖ్యలపై ఏపీ బీజేపీ చీఫ్ మాధవ్ స్పష్టమైన వివరణ ఇచ్చారు. ఆదినారాయణ రెడ్డి వ్యాఖ్యలతో బీజేపీకి ఎలాంటి సంబంధం లేదని మాధవ్ తేల్చిచెప్పారు. బీజేపీ సమావేశంలో ఆదినారాయణ రెడ్డి మాట్లాడినప్పటికీ, ఆయన వ్యక్తిగత అభిప్రాయాలతో పార్టీ ఏకీభవించడం లేదని స్పష్టం చేశారు. కూటమి పార్టీల మధ్య ఐక్యత, సమన్వయంతోనే ప్రభుత్వం ముందుకు సాగుతోందని, ఇటువంటి వ్యాఖ్యలు పార్టీ అధికారిక వైఖరి కాదన్నారు. ఈ అంశంపై ఆదినారాయణ రెడ్డి నుంచి స్పష్టమైన వివరణ తీసుకుంటామని మాధవ్ వెల్లడించారు. కూటమిలో భాగస్వామ్య పక్షాలన్నీ పరస్పర గౌరవంతో పనిచేస్తున్నాయని, ప్రజా ప్రయోజనాలే కూటమి లక్ష్యమని తెలిపారు. వ్యక్తిగత వ్యాఖ్యల వల్ల కూటమి ఐక్యత దెబ్బతినదని, బీజేపీ తన రాజకీయ క్రమశిక్షణను కచ్చితంగా పాటిస్తుందని మాధవ్ స్పష్టం చేశారు.