రంజాన్ మాస ప్రారంభ సందర్భంగా ముస్లింలకు కేసీఆర్ శుభాకాంక్షలు

- పవిత్ర ఉపవాస మాసానికి ఆధ్యాత్మిక శుభాకాంక్షలు

- గంగా జమున తహజీబ్‌కు హైదరాబాద్ ప్రతీక అన్న కేసీఆర్

- శాంతి, సామరస్యాలు మరింత పెరగాలని ఆకాంక్ష

హైదరాబాద్, 18 ఫిబ్రవరి (పీపుల్స్ మోటివేషన్): పవిత్ర రంజాన్ మాసం ప్రారంభ దినం సందర్భంగా ముస్లిం సోదర సోదరీమణులకు బీఆర్ఎస్ అధినేత కే. చంద్రశేఖర్ రావు శుభాకాంక్షలు తెలిపారు. ఇస్లాం మతస్థులు అత్యంత పవిత్రంగా భావించే ఈ మాసం ఆధ్యాత్మికత, భక్తి, నియమ నిష్ఠలకు ప్రతీకగా నిలుస్తుందని పేర్కొన్నారు. పవిత్ర ఉపవాస దీక్షలు, ప్రత్యేక ప్రార్థనలు, దైవభక్తితో సాగే రంజాన్ మాసంలో ఆధ్యాత్మిక వాతావరణం నెలకొంటుందని కేసీఆర్ అన్నారు. ఈ సందర్భంగా తెలంగాణ రాష్ట్రం, ముఖ్యంగా హైదరాబాద్ నగరం గంగా జమున తహజీబ్‌కు ప్రతీకగా నిలుస్తుందని వ్యాఖ్యానించారు. రంజాన్ మాసం ప్రజల మధ్య శాంతి, సామరస్యాలు, సౌభ్రాతృత్వ భావనలు మరింత బలపడేలా చేయాలని ఆకాంక్షించారు. సమాజంలో ఐక్యత, పరస్పర గౌరవం పెంపొందాలని, దేవుని కృప ప్రజలందరిపై ఉండాలని కోరుకున్నారు. రంజాన్ మాసం ఆత్మపరిశీలన, సేవా భావనకు దారితీసే పవిత్ర కాలమని పేర్కొంటూ, ముస్లిం సోదరులకు శుభాకాంక్షలు తెలిపారు.