తిరుమల లడ్డూ కల్తీపై బాలినేని వ్యాఖ్యలు

“ఇంతటితో అంశాన్ని వదిలేయడం మంచిది”

హిందువుల మనోభావాలు దెబ్బతినొద్దని సూచన

తప్పు చేసిన వారిని దర్యాప్తు సంస్థలు చూసుకుంటాయని వ్యాఖ్య

అమరావతి, ఫిబ్రవరి 12 (పీపుల్స్ మోటివేషన్): తిరుమల లడ్డూలో కల్తీ నెయ్యి వ్యవహారం దేశవ్యాప్తంగా చర్చనీయాంశంగా మారిన నేపథ్యంలో, జనసేన నేత, మాజీ మంత్రి బాలినేని శ్రీనివాసరెడ్డి స్పందించారు. ఈ అంశంపై అధికార పక్షం, వైసీపీ మధ్య మాటల యుద్ధం జరుగుతున్న వేళ ఆయన చేసిన వ్యాఖ్యలు ప్రాధాన్యం సంతరించుకున్నాయి. తిరుమల లడ్డూలో కల్తీ జరిగిందని టీటీడీ మాజీ చైర్మన్ వైవీ సుబ్బారెడ్డి ఇప్పటికే స్పష్టంగా చెప్పారని బాలినేని పేర్కొన్నారు. ఈ విషయంపై పదేపదే చర్చించడం వల్ల హిందువుల మనోభావాలు దెబ్బతింటాయని అన్నారు. ఇంతటితో ఈ అంశాన్ని ముగించడం మంచిదని సూచించారు. ఎవరైనా తప్పు చేసి ఉంటే వారి విషయాన్ని శ్రీ వేంకటేశ్వరస్వామి, దర్యాప్తు సంస్థలు చూసుకుంటాయని వ్యాఖ్యానించారు. రాజకీయ ప్రయోజనాల కోసం ఈ అంశాన్ని ఉపయోగించకూడదని ఆయన పరోక్షంగా సూచించారు. అదేవిధంగా ప్రకాశం జిల్లాలో జనసేన పార్టీ బాధ్యతలను ఎవరికి అప్పగించాలనేది పార్టీ అధినేత పవన్ కల్యాణ్ నిర్ణయిస్తారని బాలినేని తెలిపారు. పార్టీ నిర్ణయాలను అనుసరించడమే తమ విధి అని ఆయన స్పష్టం చేశారు.