శాసనమండలిలో వైసీపీ ఆందోళన

- నెయ్యి సరఫరా అంశంపై చర్చ డిమాండ్

- చర్చకు నిరాకరించిన ప్రభుత్వం

- పోడియం వద్ద నినాదాలు, సభ వాయిదా

అమరావతి, ఫిబ్రవరి 17 (పీపుల్స్ మోటివేషన్): శాసనమండలిలో వైసీపీ సభ్యులు ఆందోళనకు దిగారు. ఇందాపూర్ డెయిరీ పేరుతో హెరిటేజ్ సంస్థ తిరుమల తిరుపతి దేవస్థానానికి నెయ్యి సరఫరా చేసిన అంశంపై సభలో చర్చించాలంటూ వైసీపీ డిమాండ్ చేసింది. ఈ విషయాన్ని అత్యవసర ప్రజా సమస్యగా పరిగణించాలని కోరింది. అయితే ప్రభుత్వం ఈ అంశంపై తక్షణ చర్చకు అంగీకరించలేదు. దీంతో ఆగ్రహించిన వైసీపీ సభ్యులు మండలి ఛైర్మన్ పోడియం వద్దకు వెళ్లి నిరసన తెలిపారు. “హెరిటేజ్ ది కల్తీ నెయ్యి” అంటూ నినాదాలు చేశారు. సభలో ఉద్రిక్త వాతావరణం నెలకొనడంతో మండలి ఛైర్మన్ సమావేశాన్ని కొద్దిసేపు వాయిదా వేశారు. పరిస్థితిని శాంతింపజేయాలని సభ్యులకు సూచించారు. ఈ పరిణామంతో సభలో ఉదయం కార్యక్రమాలు అంతరాయం కలిగాయి.