ఎంపీ ఈటల రాజేందర్ హౌస్ అరెస్ట్

- కామారెడ్డి ఘటన నేపథ్యంలో పోలీసుల అడ్డగింత

- ఏసీపీ సహా భారీ బందోబస్తు

- ప్రభుత్వ వైఖరిపై తీవ్ర విమర్శలు

హైదరాబాద్, ఫిబ్రవరి 21 (పీపుల్స్ మోటివేషన్): ఎంపీ ఈటల రాజేందర్‌ను పోలీసులు హౌస్ అరెస్ట్ చేశారు. కామారెడ్డి ఎమ్మెల్యే కాటిపల్లి వెంకట రమణారెడ్డి నివాసంపై జరిగిన దాడి నేపథ్యంలో ఆయనను పరామర్శించేందుకు కామారెడ్డి బయలుదేరిన ఈటల రాజేందర్‌ను పోలీసులు అడ్డుకున్నారు. ఏసీపీతో పాటు భారీ సంఖ్యలో పోలీసులు ఈటల నివాసానికి చేరుకుని కట్టుదిట్టమైన బందోబస్తు ఏర్పాటు చేశారు. బయటకు వెళ్లకుండా నిరోధిస్తూ హౌస్ అరెస్ట్ చేసినట్లు సమాచారం. ఈ చర్యపై రాజకీయ వర్గాల్లో చర్చనీయాంశంగా మారింది. ఈ సందర్భంగా ఎంపీ ఈటల రాజేందర్ ప్రభుత్వ వైఖరిని తీవ్రంగా ఖండించారు. ప్రజాస్వామ్య హక్కులను అణచివేస్తున్నారని ఆరోపించారు. గుండాయిజం చేస్తూ ప్రజాస్వామ్య విలువలను దెబ్బతీస్తున్న కాంగ్రెస్ పార్టీకి ప్రజలు తగిన గుణపాఠం చెబుతారని హెచ్చరించారు. ఈ ఘటనపై మరిన్ని రాజకీయ ప్రతిస్పందనలు వెలువడే అవకాశముంది. కామారెడ్డి ఘటన నేపథ్యంలో రాష్ట్ర రాజకీయాలు వేడెక్కుతున్నాయి.