మహిళ దుస్తులు లాగడం, చెస్ట్‌పై తాకడం అత్యాచారమే: సుప్రీంకోర్టు స్పష్టం

• అలహాబాద్ హైకోర్టు తీర్పు కొట్టివేత
• సుమోటోగా కేసు విచారణ చేపట్టిన సుప్రీంకోర్టు
• మహిళల గౌరవానికి భంగం కలిగితే కఠిన చర్యల హెచ్చరిక

న్యూఢిల్లీ, 18 ఫిబ్రవరి (పీపుల్స్ మోటివేషన్): మహిళ ఒంటిపైనున్న దుస్తులను లాగడం, చెస్ట్‌పై తాకడం అత్యాచార నేర పరిధిలోకే వస్తుందని సుప్రీంకోర్టు స్పష్టం చేసింది. ఈ అంశంపై గతంలో అలహాబాద్ హైకోర్టు ఇచ్చిన తీర్పును సుప్రీంకోర్టు కొట్టివేసింది. హైకోర్టు వ్యాఖ్యలు సున్నితంగా లేవని, మహిళల గౌరవానికి భంగం కలిగించేలా ఉన్నాయని ఆక్షేపించింది. రెండువేల ఇరవై ఒకటి నవంబరులో ఉత్తరప్రదేశ్‌లోని కస్‌గంజ్ ప్రాంతంలో జరిగిన ఘటనకు సంబంధించి ఈ కేసు నమోదైంది. పదకొండేళ్ల బాలికను ఇద్దరు యువకులు ద్విచక్ర వాహనంపై తీసుకెళ్లి అసభ్యంగా ప్రవర్తించారు. దుస్తులు లాగి, ఆమెను అనుచితంగా తాకినట్లు ఆరోపణలు వచ్చాయి. బాలిక అరుపులు విని స్థానికులు చేరుకోవడంతో నిందితులు పరారయ్యారు. కుటుంబసభ్యులు పోలీసులకు ఫిర్యాదు చేశారు. కేసును విచారించిన అలహాబాద్ హైకోర్టు మహిళ చెస్ట్‌పై తాకడం, దుస్తులు లాగడం మాత్రమే అత్యాచారంగా పరిగణించలేమంటూ కేసును కొట్టివేయడంతో దేశవ్యాప్తంగా తీవ్ర విమర్శలు వ్యక్తమయ్యాయి. ఈ తీర్పు సమాజానికి తప్పుడు సందేశం ఇస్తుందని పలువురు న్యాయవేత్తలు, మహిళా సంఘాలు అభ్యంతరం వ్యక్తం చేశాయి. ఈ నేపథ్యంలో సుప్రీంకోర్టు సుమోటోగా కేసును స్వీకరించి విచారణ చేపట్టింది. మహిళల గౌరవాన్ని దెబ్బతీసే చర్యలు ఏవైనా కఠినంగా పరిగణించాల్సిందేనని స్పష్టం చేసింది. కేంద్ర, ఉత్తరప్రదేశ్ ప్రభుత్వాల వాదనలు వినిపించుకుని తుది తీర్పు వెలువరించింది. మహిళల హక్కులు, గౌరవాన్ని రక్షించడంలో న్యాయస్థానం కట్టుబడి ఉందని సుప్రీంకోర్టు పేర్కొంది.