20 నెలల్లో 6.28 లక్షల ఉద్యోగ, ఉపాధి అవకాశాలు

- ముఖ్యమంత్రి చంద్రబాబు నాయుడు

- ప్రభుత్వ ఉద్యోగాలు 30 వేలకుపైగా

- ఎంఎస్ఎంఈలు, పరిశ్రమల ద్వారా లక్షలాది ఉపాధి

- నైపుణ్యాభివృద్ధి, జాబ్ ఫెయిర్లతో అవకాశాల పెంపు

అమరావతి, మార్చి 4 (పీపుల్స్ మోటివేషన్): రాష్ట్రంలో కూటమి ప్రభుత్వం ఏర్పడిన తరువాత గత 20 నెలల్లో మొత్తం 6,28,347 ఉద్యోగాలు, ఉపాధి అవకాశాలు కల్పించామని ముఖ్యమంత్రి నారా చంద్రబాబు నాయుడు వెల్లడించారు. శాసనసభలో ప్రభుత్వం చేపట్టిన ఉద్యోగ, ఉపాధి కార్యక్రమాల వివరాలను ఆయన వెల్లడించారు.

ముఖ్యంగా ప్రభుత్వ విభాగాల్లో 30,607 ఉద్యోగాలను భర్తీ చేసినట్లు ముఖ్యమంత్రి తెలిపారు. ఇందులో డీఎస్సీ ద్వారా ఉపాధ్యాయ నియామకాలు, పోలీస్ శాఖలో కానిస్టేబుళ్ల నియామకాలు పూర్తి చేసినట్లు పేర్కొన్నారు. ప్రభుత్వ రంగంలో ఖాళీల భర్తీ ద్వారా యువతకు అవకాశాలు కల్పించామని అన్నారు. అదే సమయంలో సూక్ష్మ, చిన్న, మధ్యతరహా పరిశ్రమల ద్వారా 2,48,906 మందికి ఉపాధి అవకాశాలు కల్పించినట్లు తెలిపారు. నైపుణ్యాభివృద్ధి కార్యక్రమాలు, జాబ్ ఫెయిర్ల ద్వారా మరో 1,46,627 మందికి ఉద్యోగాలు లభించాయని పేర్కొన్నారు. పరిశ్రమల రంగంలో 95,174 మందికి, ఫుడ్ ప్రాసెసింగ్ రంగంలో 64,035 మందికి ఉపాధి కల్పించామని వివరించారు. ఐటీ మరియు ఎలక్ట్రానిక్స్ రంగంలో 13,866 ఉద్యోగాలు, పర్యాటక రంగంలో 5,028 ఉపాధి అవకాశాలు సృష్టించామని ముఖ్యమంత్రి తెలిపారు. రాష్ట్రంలో పెట్టుబడులను ఆకర్షించడం, నైపుణ్యాభివృద్ధి కార్యక్రమాలను ప్రోత్సహించడం ద్వారా యువతకు మరిన్ని అవకాశాలు కల్పించడమే ప్రభుత్వ లక్ష్యమని ఆయన స్పష్టం చేశారు.