ప్రజాభవన్‌లో లక్ష్మీ మంచుతో సీతక్క భేటీ

• మార్చి 27 కార్యక్రమానికి ఆహ్వానం
• ప్రభుత్వ పాఠశాలలకు డిజిటల్ విద్యా మద్దతు
• ట్రస్ట్ సేవలను అభినందించిన మంత్రి

హైదరాబాద్, మార్చి 3 (పీపుల్స్ మోటివేషన్): మంత్రి దనసరి సీతక్క ప్రజాభవన్‌లో నటి, ‘టీచ్ ఫర్ చేంజ్’ ట్రస్ట్ స్థాపకురాలు లక్ష్మీ మంచును కలిశారు. మార్చి 27న నిర్వహించనున్న కార్యక్రమానికి హాజరుకావాలని లక్ష్మీ మంచు ఆహ్వాన పత్రికను అందజేశారు. ఈ సందర్భంగా తమ ట్రస్ట్ ద్వారా ప్రభుత్వ పాఠశాలలకు అందిస్తున్న డిజిటల్ విద్యా మద్దతు, ఇతర సేవా కార్యక్రమాల గురించి వివరించారు. విద్యార్థుల నైపుణ్యాభివృద్ధి, సాంకేతిక పరిజ్ఞానం అందుబాటులోకి తేవడం లక్ష్యంగా చేపడుతున్న చర్యలను మంత్రి సమక్షంలో వివరించారు. ప్రభుత్వ పాఠశాలల్లో నాణ్యమైన విద్య అందించేందుకు ఇటువంటి స్వచ్ఛంద సంస్థల సహకారం ఎంతో అవసరమని సీతక్క అభిప్రాయపడ్డారు. గ్రామీణ ప్రాంతాల్లో విద్యార్థులకు డిజిటల్ సదుపాయాలు కల్పించడం ప్రశంసనీయమని అన్నారు.

సమాజానికి మేలు చేసే కార్యక్రమాలను ప్రభుత్వం ప్రోత్సహిస్తుందని మంత్రి స్పష్టం చేశారు. విద్యా రంగంలో ప్రజా భాగస్వామ్యంతో ముందుకు సాగితే మంచి ఫలితాలు సాధ్యమవుతాయని పేర్కొన్నారు.