రాముల బండలో ఆధ్యాత్మిక వేడుకలు

రథోత్సవంలో పాల్గొన్న కోమటిరెడ్డి వెంకట్ రెడ్డి

ఛత్రపతి శివాజీ మహారాజ్ విగ్రహ ఆవిష్కరణ

నల్గొండ, మార్చి 1 (పీపుల్స్ మోటివేషన్): రాముల బండ గ్రామంలో జరిగిన శ్రీ సీతా రామచంద్రుని రథోత్సవ వేడుకలు భక్తి పరవశంతో సాగాయి. ఈ సందర్భంగా భక్తజన సందోహం మధ్య పరమాత్ముని రథాన్ని గ్రామస్తులతో కలిసి లాగడం తన పూర్వజన్మ సుకృతమని మంత్రి కోమటిరెడ్డి వెంకట్ రెడ్డి పేర్కొన్నారు. గ్రామ వీధుల్లో ఆధ్యాత్మిక పరిమళం వెల్లివిరిసిందని, రథోత్సవ సంబరం విశేషంగా నిర్వహించబడిందని తెలిపారు. భక్తులతో కలిసి పాల్గొనడం ఆనందదాయక అనుభూతిని కలిగించిందన్నారు. ధర్మ పరిరక్షణలో భాగంగా ఇటువంటి వేడుకలు గ్రామాల్లో ఐక్యతను పెంపొందిస్తాయని అభిప్రాయపడ్డారు. ఈ సందర్భంగా స్వరాజ్య స్థాపకుడు ఛత్రపతి శివాజీ మహారాజ్ విగ్రహాన్ని ఆవిష్కరించడం గర్వకారణమని పేర్కొన్నారు. శివాజీ మహారాజ్ త్యాగం, ధైర్యం, దేశభక్తి నేటి తరాలకు స్ఫూర్తిదాయకమని అన్నారు. భక్తి పారవశ్యం ఒకవైపు, స్ఫూర్తిదాయక చరిత్ర మరోవైపు కలిసిన అద్భుత క్షణాలివని కోమటిరెడ్డి వెంకట్ రెడ్డి వ్యాఖ్యానించారు. గ్రామస్థులు పెద్ద ఎత్తున పాల్గొని వేడుకలను విజయవంతం చేశారు.