మద్యం కుంభకోణంలో కట్టా ప్రణయ్ ప్రకాశ్ అరెస్ట్

• నేపాల్ సరిహద్దులో పట్టుబడిన నిందితుడు
• మనీ లాండరింగ్ కోణంపై దర్యాప్తు వేగం
• ఇప్పటికే 17 మందికి అరెస్టు

విజయవాడ, మార్చి 3 (పీపుల్స్ మోటివేషన్): ఆంధ్రప్రదేశ్‌లో సంచలనం సృష్టించిన మద్యం కుంభకోణంలో మరో కీలక అరెస్ట్ జరిగింది. ఈ కేసులో ప్రధాన సూత్రధారుల్లో ఒకరిగా భావిస్తున్న కట్టా ప్రణయ్ ప్రకాశ్‌ను నేపాల్ సరిహద్దులోని సోనౌలీ చెక్‌పోస్ట్ వద్ద ప్రత్యేక దర్యాప్తు బృందం అదుపులోకి తీసుకుంది. వైఎస్సార్ కాంగ్రెస్ పార్టీ ప్రభుత్వ కాలంలో జరిగిన ఈ వ్యవహారంలో ప్రణయ్ ప్రకాశ్ ఏ-52 నిందితుడిగా ఉన్నాడు. లుక్ అవుట్ నోటీసులు జారీ కావడంతో విదేశాలకు పరారయ్యే ప్రయత్నం చేస్తున్నాడని సమాచారం అందడంతో సిట్ అధికారులు పక్కా ప్రణాళికతో పట్టుకున్నారు. అనంతరం మహారాజ్ గంజ్ కోర్టులో హాజరుపరిచి ట్రాన్సిట్ వారెంట్‌పై విజయవాడకు తరలిస్తున్నారు.

ప్రణయ్ అరెస్టుతో ఈ కేసులో మనీ లాండరింగ్ కోణంపై మరిన్ని ఆధారాలు లభించే అవకాశముందని అధికారులు భావిస్తున్నారు. గత ప్రభుత్వ హయాంలో మద్యం అమ్మకాల ద్వారా వచ్చిన అక్రమ సొమ్మును భద్రపరచడం, రవాణా చేయడంలో అతడు కీలక పాత్ర పోషించినట్లు సిట్ ఇప్పటికే గుర్తించింది. ఈ అరెస్టుతో ఇప్పటివరకు అదుపులోకి తీసుకున్న వారి సంఖ్య 17కు చేరింది. ఇటీవలే ఏపీ బెవరేజెస్ కార్పొరేషన్ మాజీ ఎండీ వాసుదేవరెడ్డి, ముప్పిడి అవినాశ్ రెడ్డి వంటి కీలక వ్యక్తులను కూడా సిట్ అరెస్ట్ చేసిన సంగతి తెలిసిందే. ప్రణయ్‌ను కస్టడీలోకి తీసుకుని విచారిస్తే ఈ కుంభకోణం వెనుక ఉన్న మరికొందరి పేర్లు, విదేశాలకు తరలిన నిధుల వివరాలు వెలుగులోకి వచ్చే అవకాశం ఉందని దర్యాప్తు అధికారులు భావిస్తున్నారు.