అమరావతి సీడ్ యాక్సెస్ రోడ్డు పనులపై మంత్రి నారాయణ సమీక్ష

• బకింగ్‌హామ్ కెనాల్‌పై స్టీల్ బ్రిడ్జ్ పరిశీలన
• భూసేకరణకు రైతులకు నెల రోజుల గడువు
• ఈ నెలాఖరుకల్లా బ్రిడ్జ్ పనులు పూర్తి చేసే లక్ష్యం

అమరావతి, 13 మార్చి (పీపుల్స్ మోటివేషన్): ఆంధ్రప్రదేశ్ రాజధాని అమరావతి నిర్మాణంలో కీలకమైన సీడ్ యాక్సెస్ రోడ్డుకు సంబంధించిన పనులను రాష్ట్ర పురపాలక శాఖ మంత్రి నారాయణ క్షేత్రస్థాయిలో పరిశీలించారు. ఉండవల్లి వద్ద బకింగ్‌హామ్ కెనాల్‌పై నిర్మిస్తున్న ఆధునిక స్టీల్ బ్రిడ్జ్ పనులను ఆయన పర్యవేక్షించారు. ఈ సందర్భంగా రాజధాని ప్రాంతానికి మెరుగైన రహదారి అనుసంధానంపై మంత్రి కీలక వ్యాఖ్యలు చేశారు. సీడ్ యాక్సెస్ రోడ్డును మంగళగిరి ప్రధాన రహదారితో అనుసంధానించేందుకు ఇంకా సుమారు 4.5 ఎకరాల భూమికి సంబంధించిన సమస్య పెండింగ్‌లో ఉందని మంత్రి తెలిపారు. ఈ భూమి సేకరణకు ప్రభుత్వం చట్టపరమైన చర్యలు తీసుకునే అవకాశం ఉన్నప్పటికీ రైతులకు మరో నెల రోజుల గడువు ఇస్తున్నట్లు వెల్లడించారు. ఏప్రిల్ 9 నాటికి రైతులు స్వచ్ఛందంగా భూసమీకరణకు ముందుకు రాకపోతే ప్రభుత్వం తప్పనిసరిగా భూసేకరణ చేపట్టాల్సి వస్తుందని మంత్రి స్పష్టం చేశారు. రాజధాని అభివృద్ధి కోసం రైతులు సహకరించాలని ఆయన విజ్ఞప్తి చేశారు.

బకింగ్‌హామ్ కెనాల్‌పై నిర్మిస్తున్న స్టీల్ బ్రిడ్జ్ పనులు వేగంగా కొనసాగుతున్నాయని మంత్రి తెలిపారు. ఈ నెలాఖరుకల్లా పనులు పూర్తి చేస్తామని నిర్మాణ సంస్థలు హామీ ఇచ్చినట్లు చెప్పారు. అలాగే గుంటూరు ఛానల్, కొండవీటి వాగులపై మరో రెండు స్టీల్ బ్రిడ్జిలు నిర్మించనున్నట్లు వెల్లడించారు. ఈ రెండు బ్రిడ్జిలు కూడా పూర్తయితే సీడ్ యాక్సెస్ రోడ్డు నిర్మాణం పూర్తవుతుందని మంత్రి నారాయణ తెలిపారు. రాజధాని ప్రాంతానికి మెరుగైన రవాణా సదుపాయాలు కల్పించేందుకు ప్రభుత్వం కట్టుబడి ఉందని ఆయన పేర్కొన్నారు.