ఫరూక్ అబ్దుల్లాపై హత్యాయత్నం విఫలం

• వివాహ వేడుకలో కాల్పుల ఘటన
• గురితప్పిన బుల్లెట్‌తో ప్రమాదం తప్పింది
• దర్యాప్తు చేస్తామని కేంద్ర హోంమంత్రి హామీ

జమ్ముకశ్మీర్, మార్చి 12 (పీపుల్స్ మోటివేషన్): జమ్ముకశ్మీర్ మాజీ ముఖ్యమంత్రి ఫరూక్ అబ్దుల్లాపై హత్యాయత్నం జరిగిన ఘటన సంచలనంగా మారింది. బుధవారం ఒక వివాహ వేడుకకు హాజరైన సమయంలో ఈ ఘటన చోటుచేసుకుంది. అక్కడ ఉన్న ఓ వ్యక్తి ఆయనపై పాయింట్ బ్లాంక్ దూరం నుంచి కాల్పులు జరపడానికి ప్రయత్నించినట్లు సమాచారం. అయితే బుల్లెట్ గురి తప్పడంతో ఫరూక్ అబ్దుల్లా ప్రమాదం నుంచి తృటిలో తప్పించుకున్నారు. వెంటనే భద్రతా సిబ్బంది అప్రమత్తమై ఆయనను అక్కడి నుంచి సురక్షితంగా తరలించారు. ఈ ఘటనపై ఫరూక్ అబ్దుల్లా స్పందిస్తూ తాను క్షేమంగానే ఉన్నానని తెలిపారు. వివాహ వేడుక ముగించుకుని వేదిక నుంచి బయటకు వస్తుండగా ఒక్కసారిగా కాల్పుల శబ్దం వినిపించిందని చెప్పారు. వెంటనే భద్రతా సిబ్బంది తనను కారులో ఎక్కించి అక్కడి నుంచి పంపించారని వెల్లడించారు. భద్రతా సిబ్బంది తక్షణమే స్పందించడం వల్లే తాను ప్రమాదం నుంచి బయటపడగలిగానని పేర్కొన్నారు. ఈ దాడి వెనుక ఉద్దేశం ఏమిటనేది ప్రస్తుతం తెలియదని ఆయన చెప్పారు.

ఘటన అనంతరం కేంద్ర హోంమంత్రి అమిత్ షా ఫరూక్ అబ్దుల్లాకు ఫోన్ చేసి క్షేమ సమాచారాలు అడిగి తెలుసుకున్నారని సమాచారం. ఈ ఘటనపై పూర్తిస్థాయి దర్యాప్తు చేపట్టాలని అధికారులను ఆదేశించినట్లు తెలుస్తోంది. ఘటనకు సంబంధించిన వివరాలను సేకరిస్తూ భద్రతా సంస్థలు విచారణ కొనసాగిస్తున్నాయి. ఇక ఫరూక్ అబ్దుల్లాపై జరిగిన హత్యాయత్నాన్ని కాంగ్రెస్ తీవ్రంగా ఖండించింది. జమ్ముకశ్మీర్ కాంగ్రెస్ కమిటీ అధ్యక్షుడు తారిఖ్ హమీద్ ఈ ఘటనపై ఆందోళన వ్యక్తం చేశారు. రాష్ట్రంలో శాంతిభద్రతల పరిస్థితిపై ప్రభుత్వం దృష్టి సారించాలని కోరారు. ఈ ఘటనపై సమగ్ర విచారణ జరిపి బాధ్యులపై కఠిన చర్యలు తీసుకోవాలని ఆయన డిమాండ్ చేశారు.