ఇందిరమ్మ ఇళ్ల నిర్మాణాలను పరిశీలించిన కలెక్టర్

- వెల్లుల్ల గ్రామంలో పనుల సమీక్ష

- నాణ్యతకు ప్రాధాన్యం ఇవ్వాలని సూచన

- పనులు వేగవంతంగా పూర్తి చేయాలని ఆదేశం

జగిత్యాల, 5 మార్చి (పీపుల్స్ మోటివేషన్): జగిత్యాల జిల్లా మెట్‌పెల్లి మండలం వెల్లుల్ల గ్రామంలో నిర్మాణ దశలో ఉన్న ఇందిరమ్మ ఇళ్లను జిల్లా కలెక్టర్ బి. సత్య ప్రసాద్ గురువారం పరిశీలించారు. ఈ సందర్భంగా ఇళ్ల నిర్మాణ పనుల పురోగతిని ఆయన సమీక్షించారు. పరిశీలన సమయంలో కలెక్టర్ లబ్ధిదారులతో మాట్లాడి నిర్మాణానికి ఉపయోగిస్తున్న ఇటుకలు, ఇసుక, సిమెంట్ వంటి సామగ్రి ధరలు మరియు వాటి నాణ్యతపై వివరాలు అడిగి తెలుసుకున్నారు. ఇళ్ల నిర్మాణంలో నాణ్యతకు ప్రత్యేక ప్రాధాన్యం ఇవ్వాలని సూచించారు. ప్రభుత్వ నిబంధనలకు అనుగుణంగా నిర్మాణ పనులు చేపట్టాలని కలెక్టర్ తెలిపారు. పనులు ఆలస్యం కాకుండా వేగవంతంగా పూర్తి చేయాలని లబ్ధిదారులకు సూచించారు.

ఇందిరమ్మ ఇళ్ల నిర్మాణాన్ని త్వరగా పూర్తి చేస్తే ప్రభుత్వ నిధులు కూడా త్వరగా విడుదల అవుతాయని ఆయన స్పష్టం చేశారు. అధికారులు నిరంతరం పనుల పురోగతిని పర్యవేక్షిస్తూ లబ్ధిదారులకు అవసరమైన సహకారం అందించాలని కలెక్టర్ ఆదేశించారు.