Health news: క్యాన్సర్ ముందస్తు హెచ్చరికలు గుర్తించండి…

• శరీర మార్పులను నిర్లక్ష్యం చేయకూడదని వైద్యుల హెచ్చరిక
• ఏడు ముఖ్య లక్షణాలతో ముందస్తు గుర్తింపు సాధ్యం
• సకాలంలో పరీక్షలు చేయించుకుంటే ప్రాణాలను రక్షించుకోవచ్చు

11 మార్చి (పీపుల్స్ మోటివేషన్): క్యాన్సర్ శరీరంలోని ఏ భాగానికైనా సోకే ప్రమాదకర వ్యాధిగా వైద్య నిపుణులు చెబుతున్నారు. అయితే దీనిని ప్రారంభ దశలోనే గుర్తిస్తే చికిత్స సులభంగా జరిగి ప్రాణాలను రక్షించుకోవచ్చని వారు సూచిస్తున్నారు. క్యాన్సర్ ముందస్తు లక్షణాలను సులభంగా గుర్తుంచుకోవడానికి ‘కాషన్’ అనే సూత్రాన్ని వైద్యులు వివరిస్తున్నారు. ఈ సూత్రం ద్వారా శరీరం ఇచ్చే హెచ్చరికలను గమనించి అవసరమైన సమయంలో వైద్య పరీక్షలు చేయించుకోవడం చాలా ముఖ్యం. మలమూత్ర విసర్జన అలవాట్లలో అసాధారణ మార్పులు కనిపించడం కూడా ఒక ముఖ్య సంకేతంగా భావిస్తారు. మూడు నుంచి నాలుగు వారాల కంటే ఎక్కువ కాలం పాటు మలబద్ధకం కొనసాగడం, మలంలో లేదా మూత్రంలో రక్తం కనిపించడం వంటి లక్షణాలు ఉంటే వైద్యుడిని సంప్రదించాలి. అలాగే రెండు లేదా మూడు వారాల పాటు మానని పుండ్లు కూడా క్యాన్సర్‌కు సంకేతం కావచ్చు. సాధారణంగా చిన్న పుండ్లు కొన్ని రోజుల్లో మానిపోతాయి. అయితే ఎక్కువ రోజులు అలాగే ఉంటే నిర్లక్ష్యం చేయకూడదని నిపుణులు సూచిస్తున్నారు.

అసాధారణ రక్తస్రావం లేదా స్రావాలు కనిపించడం కూడా ప్రమాద సంకేతంగా భావించాలి. ముఖ్యంగా మెనోపాజ్ తర్వాత యోని రక్తస్రావం రావడం గర్భాశయ క్యాన్సర్‌కు సూచన కావచ్చు. అలాగే శరీరంలో కొత్తగా కంతి లేదా గడ్డ ఏర్పడటం, అది నొప్పి లేకపోయినా క్రమంగా పెరుగుతూ ఉండటం కూడా పరీక్షలు చేయించుకోవాల్సిన అవసరాన్ని సూచిస్తుంది. అజీర్తి, ఆహారం మింగడంలో ఇబ్బంది వంటి లక్షణాలు కూడా కొన్ని సందర్భాల్లో తీవ్రమైన వ్యాధులకు సంకేతం కావచ్చు. పుట్టుమచ్చల్లో మార్పులు కనిపించడం కూడా జాగ్రత్తగా గమనించాల్సిన విషయం. పుట్టుమచ్చ పరిమాణం పెరగడం, దురదగా ఉండటం లేదా రక్తస్రావం కావడం వంటి లక్షణాలు ఉంటే వెంటనే వైద్యులను సంప్రదించాలి. అలాగే ఆరు వారాల కంటే ఎక్కువ కాలం పాటు మానని దగ్గు లేదా గొంతు బొంగురుపోవడం కూడా నిర్లక్ష్యం చేయకూడదు. ఇలాంటి లక్షణాలను ముందుగానే గుర్తించి వైద్య పరీక్షలు చేయించుకుంటే క్యాన్సర్‌ను ప్రారంభ దశలోనే గుర్తించి చికిత్స పొందే అవకాశం ఉంటుందని వైద్య నిపుణులు సూచిస్తున్నారు.