ఇందిరమ్మ ఇళ్లకు ఇసుక కొరత రానివ్వొద్దు

- కలెక్టర్ రిజ్వాన్ భాషా షేక్

- ప్రభుత్వ నిబంధనల ప్రకారం ఇసుక సరఫరా చేయాలని ఆదేశం

- ఇళ్ల నిర్మాణం వేగవంతం చేయాలని సూచనలు

- మున్సిపల్ కార్మికుల సమస్యలపై స్పందన

జోగులాంబ గద్వాల్, ఏప్రిల్ 1 (పీపుల్స్ మోటివేషన్): ఇందిరమ్మ ఇళ్ల నిర్మాణంలో ఎలాంటి ఇసుక కొరత తలెత్తకుండా చర్యలు తీసుకోవాలని జిల్లా కలెక్టర్ రిజ్వాన్ భాషా షేక్ ఆదేశించారు. బుధవారం అలంపూర్ తహసీల్దార్ కార్యాలయంలో నిర్వహించిన సమావేశంలో ఆయన పలువురు అధికారులతో సమీక్షించారు. ఈ సందర్భంగా కలెక్టర్ మాట్లాడుతూ, లబ్ధిదారులు అధిక ధరలకు ప్రైవేట్ వ్యక్తుల నుంచి ఇసుక కొనుగోలు చేయకుండా ప్రభుత్వం ద్వారా నిబంధనల ప్రకారం ఇసుక అందేలా అధికారులు చర్యలు తీసుకోవాలని సూచించారు. ఇందిరమ్మ ఇళ్ల నిర్మాణాన్ని వేగవంతం చేసి ప్రభుత్వం నిర్దేశించిన లక్ష్యాలను సాధించాలని తెలిపారు.

జిల్లాలో జనగణన కార్యకలాపాలు ఇప్పటికే ప్రారంభమైనందున సంబంధిత అధికారులు ప్రభుత్వ మార్గదర్శకాల ప్రకారం పనులను కొనసాగించాలని కలెక్టర్ రిజ్వాన్ భాషా షేక్ స్పష్టం చేశారు. అనంతరం తహసీల్దార్ కార్యాలయంలో రికార్డు గది, ఇతర విభాగాలను పరిశీలించి నిర్వహణపై ఆరా తీశారు.

అలంపూర్ మున్సిపల్ కార్మికులు తమకు పెండింగ్‌లో ఉన్న జీతాలను విడుదల చేయాలని కలెక్టర్‌ను కోరారు. దీనిపై స్పందించిన కలెక్టర్, సంబంధిత అధికారులతో చర్చించి సమస్యను పరిష్కరిస్తామని హామీ ఇచ్చారు. తదుపరి కలెక్టర్ అలంపూర్‌లో నిర్మాణంలో ఉన్న పలు ఇందిరమ్మ ఇళ్లను సందర్శించారు. లబ్ధిదారులతో మాట్లాడి నిర్మాణ పనుల పురోగతిని తెలుసుకున్నారు. ఎలాంటి సమస్యలు ఉన్నా వెంటనే అధికారుల దృష్టికి తీసుకురావాలని సూచించారు. ప్రభుత్వం పేదల గృహ అవసరాలను తీర్చేందుకు కట్టుబడి ఉందని కలెక్టర్ తెలిపారు. అధికారులు సమన్వయంతో పనిచేస్తూ ఇళ్ల నిర్మాణాన్ని సమయానికి పూర్తి చేయాలని ఆదేశించారు.